Imam Bakhsh Nasikh
yuun mujhe aap se ab karti hai taqdir juda
jis tarah jang men ho qabze se shamshir juda
mas ke zar hone se behtar hai kamal-e-insan
khaksari hai juda aur hai iksir juda
ja-e-dandan lab-e-sofar hue ai qatil
dahan-e-zakhm se hoga na tira tiir juda
maraz-e-ishq men piith apni ye bistar se lagi
na kabhi safha se jis shakl ho tasvir juda
ai junun paanv hain jab tak ye tamanna hai mujhe
kabhi manind ragon ke na ho zanjir juda
chhodun kya piiri men shirin-dahanon ki sohbat
nahin mumkin ki hon mil kar shakar-o-shir juda
kahte hain dekh ke zulf us ke rukh-e-taban par
kabhi hota nahin us shama se gul-gir juda
jab judai ke mazamin mujhe sujhe hain
harf se harf hua hai dam-e-tahrir juda
kyuun na ho jalva-e-khurshed se saae ka vajud
kya tire chehre se ho zulf-e-girah-gir juda
mujh giraftar-e-judai ke jo paanv men padi
ho junun halqe se har halqa-e-zanjir juda
main ne jo dard-e-judai se kiye hain naale
kijiye tan se mira sar pa-e-taazir juda
tegh-e-ahan se siva hai burish-e-tegh-e-zaban
haq ko batil se karegi tiri taqrir juda
ashna muttahid is darja kahan hote hain
aap dil-gir hai ‘nasikh’ jo hai dil-gir juda
Leave a Reply