Jo Jaan Se Hai Aziz Use Tu Juda Bhi Rakh

jo jaañ se hai aziiz use tū judā bhī rakh

ḳhushiyoñ ke muñh meñ dard bharā zā.iqa bhī rakh

har rāsta kahīñ na kahīñ muḌ hī jā.egā

rishtoñ ke biich thoḌā bahut fāsla bhī rakh

yuuñ bhī na ho ki jo bhī uThe tujh meñ jhāñk le

ḳhud meñ na yuuñ simaT koī dard-āshnā bhī rakh

aisā na ho ki taaza havā ajnabī lage

kamre kā ek-ādh darīcha khulā bhī rakh

shāḳh aur phuul rishta-e-yak-lamha ke asiir

apnī talab ke sāmne ye aa.inā bhī rakh

Leave a Comment