Marghoob Ali
jo jaan se hai aziiz use tu juda bhi rakh
ḳhushiyon ke munh men dard bhara za.iqa bhi rakh
har rasta kahin na kahin muḌ hi ja.ega
rishton ke biich thoḌa bahut fasla bhi rakh
yuun bhi na ho ki jo bhi uThe tujh men jhank le
ḳhud men na yuun simaT koi dard-ashna bhi rakh
aisa na ho ki taaza hava ajnabi lage
kamre ka ek-adh daricha khula bhi rakh
shaḳh aur phuul rishta-e-yak-lamha ke asiir
apni talab ke samne ye aa.ina bhi rakh
Leave a Reply