Suleman Khumar
shanaḳht miT ga.i chehre pe gard itni thi
hamari zindagi sahra-navard itni thi
tamam-umr use sinchte rahe lekin
gulab de na saki shaḳh zard itni thi
gire na ashk kabhi hadson ke daman par
hamari aankh shanasa-e-dard itni thi
tiri pukar ka chehra dikha.i de na saka
mire qarib sadaon ki gard itni thi
talash-e-zist men dil jaisi chiiz chhuT ga.i
hikayat-e-dil-o-jan fard fard itni thi
jhulasti dhuup ka us par guman guzarta tha
bichhi thi raah men jo chhanv zard itni thi
pighal saki na kabhi barf akele-pan ki ‘ḳhumar’
vo sho.ala-ru bhi tabi.at ki sard itni thi
Leave a Reply