guzre hain ham pe aise bhi lamhe kabhi kabhi
dil ro paḌa hai sun ke latife kabhi kabhi
sahra se tishnagi ka sabab puchhte ho kya
dariya bhi ham ne dekhe hain pyase kabhi kabhi
gum-karda rah-e-zist sahi is ke bavajud
puchhe hain ham se ḳhizr ne raste kabhi kabhi
ai na-ḳhuda-e-vaqt na itna ghurur kar
Duube hain sahilon pe safine kabhi kabhi
har dil ko aap a.ina-ḳhana na janiye
patthar se saḳht hote hain shishe kabhi kabhi
‘sumbul’ hua hai ye bhi ki ghazlon ke ruup men
nazil hue hain ham pe sahife kabhi kabhi
Leave a Reply