jagah jagah se shikasta hain ḳham hain divaren
na jaane kitne gharon ka bharam hain divaren
chhaton ka zikr hi kya un ko le uḌi hai hava
ab hadsat ke zer-e-qadam hain divaren
barasti barishon men hongi mojib-e-ḳhatra
abhi to dhuup men abr-e-karam hain divaren
hamare ḳheme tanabon ke bal pe qaa.em hain
chhaten to ḳhuub mayassar hain kam hain divaren
qadim shahron men har-su qadam qadam bikhri
purani rah-guzaron men zam hain divaren
kahin dariche hain shan-o-shikoh ke marsiyan-ḳhvan
kahin mazar-e-vaqar-o-hasham hain divaren
ye fart-e-girya-o-zari ka hai asar ‘mansha’
zamin makanon ki giili hai nam hain divaren
Leave a Reply