Muneer Niyazi
phuul the badal bhi tha aur vo hasin surat bhi thi
dil men lekin aur hi ik shakl ki hasrat bhi thi
jo hava men ghar bana.e kaash koi dekhta
dasht men rahte the par ta.amir ki aadat bhi thi
kah gaya main samne us ke jo dil ka mudda.a
kuchh to mausam bhi ajab tha kuchh miri himmat bhi thi
ajnabi shahron men rahte umr saari kaT ga.i
go zara se fasle par ghar ki har rahat bhi thi
kya qayamat hai ‘munir’ ab yaad bhi aate nahin
vo purane ashna jin se hamen ulfat bhi thi
Leave a Reply