dekh dil ko mire o kafir-e-be-pir na tod
ghar hai allah ka ye is ki to tamir na tod
ghul sada vadi-e-vahshat men rakhunga barpa
ai junun dekh mire paanv ki zanjir na tod
dekh tuk ghaur se aina-e-dil ko mere
is men aata hai nazar alam-e-tasvir na tod
taj-e-zar ke liye kyuun shama ka sar kaate hai
rishta-e-ulfat-e-parvana ko gul-gir na tod
apne bismil se ye kahta tha dam-e-naza vo shokh
tha jo kuchh ahd so o ashiq-e-dil-gir na tod
raqs-e-bismil ka tamasha mujhe dikhla koi dam
dast o pa maar ke dam tu tah-e-shamshir na tod
saham kar ai ‘zafar’ us shokh kaman-dar se kah
khinch kar dekh mire siine se tu tiir na tod
Leave a Reply