Asra Rizvi
balidagi-e-zarf pe dikhla.e ga.e log
har gaam pe gum-nam hai miTva.e ga.e log
is farsh-e-tilismi ko ata kar di faraghat
yuun tasht-e-farebi men hi bikhra.e ga.e log
qismat ki lakiron men jinhen bandh ke rakkha
azadi ki masnad pe bhi biThla.e ga.e log
har roz naya ek tamasha hua jaari
ara.ish-e-duniya men jo uljha.e ga.e log
pechidgi-e-fikr men kya ḳhuub phansaya
ehsas ke shanon se hi suljha.e ga.e log
duniya men darindon ko baḌe faḳhr se bheja
har zulm pe phir sabr se samjha.e ga.e log
ik ḳhauf tha us ja-e-pareshan ki faza men
be-ḳhauf jo kuchh nikle vo dhamka.e ga.e log
be-ḳhaufi se jab ḳhauf baḌha ahl-e-jahan ka
maqtul hue ḳhaak men dafna.e ga.e log
haq chup hi rahe lab na khulen sar na uTha.e
is vaste be-maut bhi marva.e ga.e log
nairangi-e-kirdar pe hairan hain ‘asra’
sau pahlu se ik bazm men milva.e ga.e log
Leave a Reply