farzanon ki is basti men ek ajab sauda.i hai
kis ke liye ye haal hai us ka kaun aisa harja.i hai
kis ke liye phirta hai akela shahr ke hangamon se duur
kaun hai jis ki ḳhatir us ko tanha.i raas aa.i hai
kis ke lab o ruḳhsar ki baten Dhal jaati hain ghazlon men
kis ke ḳham-e-kakul ki kahani vaj.h-e-suḳhan-ara.i hai
kaun hai jis ki mahrumi ke daagh hain us ke siine men
kaun hai jis ke ḳhvabon ki ik duniya main ne saja.i hai
kyuun us ki ashufta-sari ka charcha hai ham logon men
kyuun itni pur-kaif-o-soz us ki shab-e-tanha.i hai
‘at.har’ aao ham bhi us ke dil ki baten sun aa.en
kahte hain divana hai vo vahshi hai sauda.i hai
Leave a Reply