main talash men kisi aur ki mujhe DhunDhta koi aur hai
main saval huun kisi aur ka mera mas.ala koi aur hai
kabhi chand-chehron ki bhiiḌ se jo nikal ke aaya to ye khula
vo jo asl tha use kho diya jise pa liya koi aur hai
kaTi umr ek usi chaah men use dekhte kisi raah men
magar ik zamane ke ba.ad jo hua ashna koi aur hai
faqat ek pal ke firaq men ka.i ḳhvab kirchiyan ho ga.e
jo palaT ke aa.e to yuun laga yahan silsila koi aur hai
vahi log hain vahi naam hain vahi ghar vahi dar-o-bam hain
magar ab darichon ki oT se hamen jhankta koi aur hai
kisi aane vaale safar ki jab karo ibtida to ye sochna
main akela is men sharik huun ki mire siva koi aur hai
use mil ke aa.e to shaam ko mujhe aa.ine ne kaha suno
vo jo sub.h-dam tha hasan-‘raza’ vo tumhi ho ya koi aur hai
Leave a Reply