mujh men tanha.i miri aur main tanha.i men
ajnabi ho ga.e sab dasht-e-shanasa.i men
apne andar hi ra.unat ki faza hai shayad
log utarte hi nahin ruuh ki gahra.i men
khul gaya ab ki hai adab-e-mohabbat baḌi chiiz
ham jo maruf hue jalva-e-rusva.i men
ye to tai hai ki mujhe tujh se juda hona hai
misl aansu huun tiri chashm-e-tamanna.i men
aap to hashr uThane ke liye kahte the
aankh tak uTh na saki alam-e-rusva.i men
umr kaaTi hai isi ek talab men ‘afaq’
ik nazar dekh le mujh ko koi tanha.i men
Leave a Reply