daulat-e-husn ki bhi hai kya luut
ankhon ko pad gai hai luta-lut
chal rahi hai dila hava-e-bahar
laala phula hai dagh-e-sauda luut
samne tere jo pade ai turk
us men kaaba ho ya kalisa luut
chaar din hai bahar ai bulbul
zar-e-gul ka hazar toda luut
saf-e-mizhgan se kah rahi hai vo chashm
dil milen jitne be-tahasha luut
sarf-e-allah mal-e-duniya kar
mard hai kuchh to bahr-e-uqba luut
saaf dil ho to jalva-gar ho yaar
aaina ho to ho tamasha luut
neamat-khvan-e-husn jo mil jaae
ye samajh le hai mann-o-salva luut
gauhar-e-abla hue to chale
lenge divano khar-e-sahra luut
jante hain ki fauj-e-jangi se
nahin sardar pher leta luut
kaam mardon ka hai ye ai ‘atish’
rakhti hai jaan ka bhi khatka luut
Leave a Reply