Sarvat Husain
bhar ja.enge jab zaḳhm to a.unga dobara
main haar gaya jang magar dil nahin haara
raushan hai miri umr ke tarik chaman men
is kunj-e-mulaqat men jo vaqt guzara
apne liye tajviz ki shamshir-e-barhana
aur us ke liye shaḳh se ik phuul utara
kuchh siikh lo lafzon ko baratne ka saliqa
is shughl men guzra hai bahut vaqt hamara
lab khole pari-zad ne ahista se ‘sarvat’
jon guftugu karta hai sitare se sitara
Leave a Reply