mila hai tapta sahra dekhne ko
chale the ghar se dariya dekhne ko
chalo apna hi manzar aap dekhen
kahan jaa.en tamasha dekhne ko
sar-e-maqtal kise laaya gaya hai
chali aati hai duniya dekhne ko
fasurda phuul uḌte zard patte
chaman men rah gaya kya dekhne ko
mili hai muḳhtasar si fursat-e-did
tamasha-gah-e-duniya dekhne ko
charagh-e-rahguzar jugnu sitara
kiran koi to rasta dekhne ko
phire hain anjuman-dar-anjuman ham
use jalva-ba-jalva dekhne ko
Leave a Reply