koi ye kaise batae ki vo tanha kyuun hai
vo jo apna tha vahi aur kisi ka kyuun hai
yahi duniya hai to phir aisi ye duniya kyuun hai
yahi hota hai to akhir yahi hota kyuun hai
ik zara haath badha den to pakad len daman
un ke siine men sama jaae hamari dhadkan
itni qurbat hai to phir fasla itna kyuun hai
dil-e-barbad se nikla nahin ab tak koi
is lute ghar pe diya karta hai dastak koi
aas jo tuut gai phir se bandhata kyuun hai
tum masarrat ka kaho ya ise gham ka rishta
kahte hain pyaar ka rishta hai janam ka rishta
hai janam ka jo ye rishta to badalta kyuun hai
Leave a Reply