main ḳhud hi ḳhugar-e-ḳhalish-e-justuju na tha
dushvar varna marhala-e-arzu na tha
nahaq ḳharab-e-minnat-e-darman hua na dard
mamnun-e-zaḳhm huun ki maqam-e-rafu na tha
ya ashna-e-ramz talab hi na thi zaban
lab va hue to hausla-e-guftagu na tha
na-pursish-e-vafa ki ye naubat kabhi na thi
dil yuun suluk-e-ahl-e-karam se lahu na tha
haan kab ba-nam-e-ishq havas surḳh-ru na thi
haan kab niyaz-e-shauq subuk ku-ba-ku na tha
ḳhush-fahmi-e-ḳhayal ki ab zid ka kya ilaaj
varna jo shaam paas se guzra tha tu na tha
‘gauhar’ ghazal se dhul to gaya kuchh ghubar-e-gham
har chand ye hunar sabab-e-abru na tha
Leave a Reply