koi chehra na sada koi na paikar hoga
vo jo bichhḌega to badla hua manzar hoga
be-shajar shahr men ghar us ka kahan tak DhunDen
vo jo kahta tha ki angan men sanobar hoga
apne sab ḳhvab na yuun aankh men le kar niklo
dhuup hogi to kisi haath men patthar hoga
ham se kahta tha ye nadida zaminon ka safar
kahin sahra to kahin niila samundar hoga
us ne kuchh bhi na liya ham se zar-e-gul ke evaz
vo kisi phuul ki basti ka tavangar hoga
ham agar hote use saya-e-gul men rakhte
jis ne dhupon men jalaya vo sitamgar hoga
jism ki aag mira naam bacha.e rakhna
ab ke sunte hain ki barfila december hoga
Leave a Reply