Shahbaz Khwaja
zindagi shab ke jaziron se udhar DhunDte hain
aankh men ashk jo chamken to sahar DhunDte hain
ḳhaak ki tah se udhar koi kahan milta hai
ham ko malum hai ye baat magar DhunDte hain
kar-e-duniya se ulajhti hain jo sansen apni
zaḳhm ginte hain kabhi misra-e-tar DhunDte hain
be-hunar hona bhi hai maut ki surat ai dost
zinda rahne ke liye koi hunar DhunDte hain
dastaken kab se hatheli men chhupi hain ‘shahbaz’
shahr-e-asrar ki divar men dar DhunDte hain
Leave a Reply