Anand Narayan Mulla
sub.h-e-nau aa ga.i tirgi miT ga.i shor hai har taraf inqalab aa gaya
mujh ko Dar hai andhera koi raat ka munh pe Daale sahar ki naqab aa gaya
husn ki ye ada bhi hai kitni hasin ik tabassum men sab kuchh hai kuchh bhi nahin
apni apni samajh apna apna yaqin har saval nazar ka javab aa gaya
bazm-e-hasti men hangama barpa kiye koi giita liye koi qur.an liye
main bhi saaqi ke hathon se paa.i thi jo le ke apni sunahri kitab aa gaya
fitrat-e-husn ko kaun samjhe bhala gah ata hi ata gah jafa hi jafa
gaah taqsir ki aur hansi aa ga.i gaah sajde kiye aur itaab aa gaya
ziist ki talḳhiyan al-aman phir bhi vo chhin paa.en na mere labon se hansi
ishq tu ne diya vo gham-e-shadman ho ke nakam main kamyab aa gaya
gardish-e-roz-o-shab ne na jaane kahan ki nikali hai ‘mulla’ se ye dushmani
us ne saghar uThaya sahar ho ga.i us ne saghar rakha mahtab aa gaya
Leave a Reply