kisi ki den hai lekin miri zarurat hai
junun kamal nahin hai kamal-e-vahshat hai
main zindagi ke sabhi gham bhula.e baiTha huun
tumhare ishq se kitni mujhe sahulat hai
guzar ga.i hai magar roz yaad aati hai
vo ek shaam jise bhulne ki hasrat hai
zamane vaale to shayad nahin kisi qabil
jo milta rahta huun un se miri muravvat hai
hava bahar ki aa.egi aur main chumunga
vo saare phuul ki jin men tiri shabahat hai
ḳhuda rakhe tiri ankhon ki dil-navazi ko
tiri nigah miri umr bhar ki daulat hai
tire baghair bujha ja raha huun andar se
jo Thik-Thak huun bahar se to ye aadat hai
jo ho sake to mujhe apne paas rakh lena
tira visal to ik sanvi sa.adat hai
tire baghair koi kaise zinda rahta hai
magar main huun ki yahi ishq ki rivayat hai
Leave a Reply