Koi Mujh Sa Mustahiqq-E-Rahm-O-Gham-Khwari Nahin

koi mujh sa mustahiqq-e-rahm-o-gham-khvari nahin

sau maraz hain aur ba-zahir koi bimari nahin

har qadam par bagh-e-alam men bichha hai dam-e-husn

kaun aisa hai jise zauq-e-giraftari nahin

dekhe gar ghaur se duniya hai ghaflat ka tilism

ye bhi khvab-e-ishq hai furqat se bedari nahin

jaan le kar bhi jo haath aae to arzan janiye

sahal aisi jins-e-ulfat ki kharidari nahin

ishq ki nakamiyon ne is qadar khincha hai tuul

mere gham-khvaron ko ab yara-e-gham-khvari nahin

mujh se zabt-e-dard-e-ulfat ki shikayat hai fuzul

ai dil-e-nadan tujhe ehsas-e-khud-dari nahin

meri daulat dekh kar kyuun tum ne thanDi saans li

be-kason par rasm-e-ain-e-sitamgari nahin

har taraf se ye sada aati hai mulk-e-husn men

ye vo duniya hai jahan rasm-e-vafadari nahin

ho gaya shayad ki sarf-e-soz-e-gham sab khun-e-dil

ansuon ka ab vo dariya aankh se jaari nahin

us ko rahm aae kahan ye na-umidi men umiid

dil ko khush karna hai shaghl-e-girya-o-zari nahin

ham hain chup baithe hue lekin hai dil masruf-e-ishq

is adim-ul-fursati ka naam bekari nahin

band aankhon se nazar aati hai har shai dahr ki

alam-e-ruya men farq-e-khvab-o-bedari nahin

Leave a Comment