mahfilen ḳhvab huiin rah ga.e tanha chehre
vaqt ne chhin liye kitne shanasa chehre
saari duniya ke liye ek tamasha chehre
dil to parde men rahe ho ga.e rusva chehre
tum vo bedard ki muḌ kar bhi na dekha un ko
varna karte rahe kya kya na taqaza chehre
kitne hathon ne tarashe ye hasin taj-mahal
jhankte hain dar-o-divar se kya kya chehre
so.e patton ki tarah jagti kaliyon ki tarah
ḳhaak men gum to kabhi ḳhaak se paida chehre
ḳhud hi virani-e-dil ḳhud hi charagh-e-mahfil
kabhi mahrum-e-tamanna kabhi shaida chehre
ḳhaak uḌti bhi rahi abr barasta bhi raha
ham ne dekhe kabhi sahra kabhi dariya-chehre
yahi imroz bhi hangama-e-farda bhi yahi
pesh karte rahe har daur ka naqsha chehre
diip jalte hi rahe taaq pe armanon ke
kitni sadiyon se hai har ghar ka ujala chehre
ḳhatm ho jaa.en jinhen dekh ke bimari-e-dil
DhunDh kar laa.en kahan se vo masiha chehre
dastan ḳhatm na hogi kabhi chehron ki ‘jamil’
husn-e-yusuf to kabhi ishq-e-zuleḳha chehre
Leave a Reply