Zahid Chaudhry
chala huun ghar se main ahval-e-dil sunane ko
vo muntazir hain mira zabt azmane ko
raqib saath hai aur zer-e-lab tabassum hai
ajab tarah se vo aaya hai dil dukhane ko
agarche bazm-e-tarab men havas ka ghalba hai
main aa gaya huun mohabbat ke giit gaane ko
main ja raha huun vahan jabki az-rahe-tafrih
saji hai bazm mira shauq azmane ko
ravish ravish men hai afsurdagi ki afza.ish
vo phir bhi nikle hain tafrih-e-gul manane ko
junun-e-ishq mira jabki ik haqiqat hai
alag karunga main is ishq se fasane ko
main chahta tha mira ishq ek raaz rahe
vo aa gaya to ḳhabar ho ga.i zamane ko
vo jin se mujh ko tavaqqo thi pasbani ki
vo aa ga.e hain mira ashiyan jalane ko
janab-e-shaiḳh ki ye vo ruḳhi ma.az-allah
hui hai shab to chale hain sharab-ḳhane ko
rah-e-hayat men bahrupiyon se vaqif huun
jo gham-gusar bane mera dil dukhane ko
jo be-ḳhabar hain sarapa vo phir rahe hain aaj
qadam qadam pe na.i dastan sunane ko
jidhar nigah uThao ravan hai ḳhun-e-jigar
ḳhabar nahin ki ye kya ho gaya zamane ko
Leave a Reply