Hath Mein Jab Tak Qalam Tha Tajribe Likhte Rahe

Ishrat Qadri

haath men jab tak qalam tha tajribe likhte rahe

ham zamin par asman ke mashvare likhte rahe

umr kitni kaT ga.i hijrat men socha hi nahin

chehre ki saari lakiren aa.ine likhte rahe

mausamon ki dastaken chiḳhon men dab kar rah ga.iin

giit ki farma.ishen thiin marsiye likhte rahe

tum na paḌhna vo safar-nama jo nok-e-ḳhar par

ku-ba-ku sahra-ba-sahra aable likhte rahe

hadse jin par mo.arriḳh ki zaban khulti nahin

shahr ki divar par ham ḳhuun se likhte rahe

kar-nama aur kya karte ye naqqadan-e-asr

nok-e-ḳhanjar se ghazal par hashiye likhte rahe

kaifiyat shaḳh-e-nihal-e-gham ki ‘ishrat’ sub.h-o-sham

ate-jate mausamon ke qafile likhte rahe