Ismail Merathi
rusva hue baghair na naz-e-butan utha
jab ho gae subuk to ye bar-e-giran utha
maani men kar talash maash-e-dil-o-dimagh
haivan-sifat na lazzat-e-kam-o-dahan utha
gar khanda yaad aae to siine ko chaak kar
gar ghamza yaad aae to zakhm-e-sinan utha
ya aankh utha ke chashm-e-fusun-saz ko na dekh
ya umr-bhar masaib-e-daur-e-zaman utha
us anjuman men jaiye ab kis umiid par
ham baithne na paae ki vo bad-guman utha
be-yad-e-dost umr-e-girami na sarf kar
us ganj-e-shaegan ko na yuun raegan utha
vasl-o-firaq vahm sahi dil-lagi to hai
phir ham kahan jo parda-e-raz-e-nihan utha
parvane ki tapish ne khuda jaane kaan men
kya kah diya ki shama ke sar se dhuan utha
Leave a Reply