ba-faiz-e-gardish-e-ayyam ham ko
kisi surat nahin aram ham ko
sukun dushman junun-parvar iradao
na kar dena kahin badnam ham ko
fasurda ḳhalvaton men yaad aa kar
rulate hain vo sub.h-o-sham ham ko
uTha ai mutriba saz-e-mohabbat
pila ai saqi-e-gulfam ham ko
na ham ko zindagi ki hai zarurat
na duniya se hai koi kaam ham ko
kisi ki bevafa.i ke fasane
sunata hai dil-e-nakam ham ko
kisi ne apni mast ankhon se ‘nayyar’
diya hai pyaar ka paigham ham ko
Leave a Reply