Ashfaq Husain
lamha-e-talḳhi-e-guftar talak le aaya
vo mujhe apne hi me.aar talak le aaya
kya rakhe us se koi silsila-e-guft-o-shunid
ghar ki baton ko jo bazar talak le aaya
main ne jo baat bharose pe kahi thi us se
vo use surḳhi-e-aḳhbar talak le aaya
ghar men jab kuchh na bacha us ki ianat ke liye
main uTha kar dar-o-divar talak le aaya
us ki ankhon men ajab sehr tha main jis ke sabab
dil ki baten lab-e-iz.har talak le aaya
vo jo qaa.il hi na tha meri mohabbat ka use
rafta rafta had-e-iqrar talak le aaya
mere har jhuuT ko duniya ne saraha lekin
ek sach marhala-e-dar talak le aaya
Leave a Reply