Sulaiman Areeb
jo tere husn men narmi bhi bankpan bhi hai
vo kaif-e-taza bhi hai nashsha-e-kuhan bhi hai
mujhe to chain se rahne de ai dil-e-vahshi
ki dasht bhi hai tire samne chaman bhi hai
kahan ki manzil-e-maqsud rasta bhi nahin
safar men saath ḳhuda bhi hai ahrman bhi hai
vo ek lamha-e-parran vo ek sa.at-e-did
hina ba-dast bhi hai lala-pairahan bhi hai
ba-chashm-e-shabnam-e-giryan agar koi dekhe
tira libas hi ai gul tira kafan bhi hai
vo ek gosha-e-dakan jise dakan kahiye
nigar sha.ir-e-badnam ka vatan bhi hai
Leave a Reply