vafa ki raah se mastana-var ham guzre
hazar manzilen aa.iin hazar gham guzre
hayat silsila-e-gham sahi magar ai dost
ḳhayal men hain vahi hadse jo kam guzre
ḳhushi ke phuul khila.e the is nazar ne jahan
ham us dayar se aksar ba-chashm-e-nam guzre
sitam-zada si hai duniya tumhare jaane se
kahen to kis se kahen ham pe kya sitam guzre
khaḌe hain der se ham darmiyan-e-ka.aba-o-dair
idhar se kaash koi sahab-e-karam guzre
bahut hujum sahi un ki raah men lekin
vahan to koi nahin tha jahan se ham guzre
nishan-e-manzil-e-janan to mil gaya ‘shahid’
magar ye gham hai ki rahon ke pech-o-ḳham guzre
Leave a Reply