tilism-khana-e-asbab mere samne tha
mira hi dekha hua khvab mere samne tha
vahi nahin tha jise dil talak rasai thi
ki yuun to majma-e-ahbab mere samne tha
tamam umr sitare talash karta phira
palat ke dekha to mahtab mere samne tha
main ik sada ke tahayyur men ghir gaya varna
kinara samne girdab mere samne tha
kitab-e-ishq khuli thi suna raha tha koi
main padh raha tha naya baab mere samne tha
main dhundta raha maazi ke gum-shuda auraq
nisab-e-mimbar-o-mehrab mere samne tha
rida-e-faqr bacha le gai mujhe varna
fareb-e-atlas-o-kam-khvab mere samne tha