Naya Lahja Naya Manzar Naya Pindar Ho Paida

Qurban Aatish

naya lahja naya manzar naya pindar ho paida

mire naghmon se aisi raunaq-e-gulzar ho paida

yahi tha maslahat-andesh mausam ka taqaza kya

sada-e-ḳhamushi se ik na.i guftar ho paida

bikhar jaata hai sab shiraza-e-amn-o-sukun aḳhir

agar basti men koi aadmi ḳhun-ḳhvar ho paida

kahan bardasht ho sakta hai ye mujh se kisi surat

samar pakne se pahle hi koi haqdar ho paida

hamesha chheḌta huun saaz apne kohna zaḳhmon ka

mire dil ke bayaban men koi gulzar ho paida

yahi main chahta huun ai ghazala dasht-o-sahra men

ki ab mere junun se garmi-e-bazar ho paida

mazamin ghaib se aate nahin ‘atish’ to kya kachche

kahan se sher koi bhi mira tah-dar ho paida