munshi-naubat-rai-nazar-lakhnavi

Intizar-E-Hashr Kar Sakte Nahin Nakaam-E-Ishq

intizar-e-hashr kar sakte nahin nakam-e-ishq

aaj hi ho jaae hona ho jo kal anjam-e-ishq

ibtida men dard-e-furqat maut hai anjam-e-ishq

ahl-e-dil ko na-muvafiq hai hava-e-bam-e-ishq

be-khudi men DabDaba aae hain aansu aankh men

al-madad ai zabt chhalka chahta hai jam-e-ishq

us ki ulfat ne kiya rusva-e-alam kis qadar

ungliyan uthti hain jaate hain jidhar badnam-e-ishq

kyon nasihat men tiri naseh hain ye dil-soziyan

kya tire dil par guzarte hain mire alam-e-ishq

chashm-e-giryan qalb-e-nalan ki shamatat qahr hai

donon mil kar ik mujhi ko dete hain ilzam-e-ishq

hasraten bhi aaj dil ke saath hi dam tod den

aage pichhe saath valon ka na ho anjam-e-ishq

baam par aa kar zara bikhraiye zulf-e-daraz

phail jaae saare aalam men savad-e-sham-e-ishq

aur kya eajaz hota husn-e-laila ke liye

mar gaya majnun magar zinda hai ab tak nam-e-ishq

chaar hi din men ‘nazar’ tum is qadar ghabra gae

asman se koi puchhe gardish-e-ayyam-e-ishq

More Poems

Leave a Comment