tum jo shamil hue ḳhayalon men
raushni aa ga.i havalon men
ab to ai chand baam par aa ja
chandni aa ga.i hai balon men
us ne nazren hi pher li mujh se
kuchh nahin rah gaya savalon men
ek lamhe ki to zarurat thi
aur vo lamha na aaya salon men
teri ankhon pe baat hone lagi
jang si chhiḌ ga.i ghazalon men
qatl insaniyat ka karte hain
bheḌiye aadmi ki khalon men
ye ‘muqaddas’ haqiqi duniya hai
aap rahti hain kin ḳhayalon men
Leave a Reply