ye jo sar ham tiri chaukhat se lagae hue hain
ye samajh le ki zamane ke satae hue hain
ham ne is dil ko kahin aur lagaya hua hai
aur ye haath kahin aur uthae hue hain
tujhe dekhun to mujhe yaad ye kaun aata hai
tu ne ye rang bhala kis ke churae hue hain
kar-e-duniya ne hamen mohlat-e-yak-khvab na di
so kahin khoe hue hain na hi paae hue hain
ham hi kuchh gosh-bar-avaz nahin the varna
tum ne pahle bhi yahi bol sunae hue hain
kis liye yaad dilate ho abhi rahne do
kya hua ham jo koi baat bhulae hue hain
kaam jo ham se nahin hoga kiye jaate hain
ham se uthta jo nahin bojh uthae hue hain
dekhne ki tujhe kuchh dil men hai hasrat bhi abhi
aur ye bhi ki tire shahr men aae hue hain