vo jo be-saḳhta hansne ki ada thi teri
tujh ko ma.alum nahin vo hi dava thi teri
hijr raton men use oḌh ke so jaata tha
paas mere jo udasi ki rida thi teri
tere ik dost ne puchha tha ye ro kar mujh se
hai qasam tujh ko bata de ki vo kya thi teri
bad-dua apne liye ḳhuub kari thi main ne
haan magar raah men haa.il jo dua thi teri
teri avaz pe lauT aa.e the teri janib
puchhna kuchh bhi nahin tha ki raza thi teri
Leave a Reply