Kafeel Aazar Amrohvi
aaj main ne use nazdik se ja dekha hai
vo daricha to mire qad se bahut uncha hai
apne kamre ko andheron se bhara paaya hai
tere baare men kabhi ghaur se jab socha hai
har tamanna ko rivayat ki tarah toḌa hai
tab kahin ja ke zamana mujhe raas aaya hai
tum ko shikva hai mire ahd-e-mohabbat se magar
tum ne paani pe koi lafz kabhi likkha hai
aisa bichhḌa ki mila hi nahin phir us ka pata
haa.e vo shaḳhs jo aksar mujhe yaad aata hai
koi us shaḳhs ko apna nahin kahta ‘azar’
apne ghar men bhi vo ghairon ki tarah rahta hai
Leave a Reply