Nazish Partap Gadhi
aah ko naghma ki naghme ko fughan karna paḌe
dekhiye kya kuchh bara.e dostan karna paḌe
ahl-e-mahfil ghaur se sunte rahen rudad-e-dil
kya ḳhabar kis lafz ko kab dastan karna paḌe
rakh jabin-e-shauq men mahfuz garmi-e-niyaz
kaun jaane tujh ko ik sajda kahan karna paḌe
puchhiye us se zaban-o-lafz ki majburiyan
jis ko hal-e-dil nigahon se bayan karna paḌe
kuchh vahi samjhega ‘nazish’ aaj ke mahaul ko
jis ko zindan par yaqin-e-gulsitan karna paḌe
Leave a Reply