Kaisa Pyara shaKHs Tha Aur Main KHwab Mein Rakh Kar Bhul Gai

Samina Saqib

kaisa pyara shaḳhs tha aur main ḳhvab men rakh kar bhuul ga.i

jaise kaghaz ki kashti girdab men rakh kar bhuul ga.i

raushan raushan moti jaisa saaf sajila paani tha

jaane kaun thi chand ko jo talab men rakh kar bhuul ga.i

jab bhi us pe khulna chaha gaal haya se laal hue

us ko paane ki ḳhvahish adab men rakh kar bhuul ga.i

soch ke dhage se bun kar kuchh sapne phenke kaghaz par

kya karna us ḳhvab ka jo a.asab men rakh kar bhuul ga.i

sub.h savere maan ne pukara bhagi bhagi ghar pahunchi

ik juuta tha pair men duuja ḳhvab men rakh kar bhuul ga.i

bah gaya hoga paani men ab jhiil men us ko DhunDungi

ik chehra jo ashkon ke sailab men rakh kar bhuul ga.i

us se milne jaana tha main pul ke raste mil aa.i

kachcha sohni tera ghaḌa main chanab men rakh kar bhuul ga.i