bisat-e-shauq ke manzar badalte rahte hain
hava ke rang barabar badalte rahte hain
butan-e-rang bhi kuchh kam nahin hayulon se
qadam qadam pe ye paikar badalte rahte hain
chhupa.e chhupti nahin un se kohnagi dil ki
na.e libas vo har-dam badalte rahte hain
rahi nahin kabhi yak-rang asman ki jabin
huruf-e-lauh-e-muqaddar badalte rahte hain
qayam karta nahin dil men chaar din koi
makin ḳhana-e-be-dar badalte rahte hain
bahut naya tha jo kal ab vahi purana hai
mazar-e-dahr ke patthar badalte rahte hain
Leave a Reply