Sajjad Syed
ruḳh pe haya ka rang-e-shahabi naqab sa
iz.har ke labon pe larazta hijab sa
chehra ki jaise ek sahifa ho nuur ka
lahja na.i ghazal ki naveli kitab sa
sadiyon ki furqaton men mujhe qaid kar gaya
vo lamha-e-visal ki tha jo sarab sa
main tha hisar-e-zat ki ḳhamoshiyon men gum
chheḌa hai aaj kis ne ye dil ka rubab sa
sadiyon ki ik tavil rifaqat ke bavajud
hain vo hi fasle se vahi ijtinab sa
vo pichhle inqalab hi kya de ga.e hamen
ik laao inqalab jo ho inqalab sa
‘sajjad’ apne hosh-o-ḳhirad ko bacha.iyo
saaqi bana hua hai jo ḳhud hai sharab sa
Leave a Reply