dost kahte hain tire dasht-e-vafa men kaise
itni khushbu hai mahakta ho gulistan jaise
go badi chiiz hai ghamkhavari-e-arbab-e-vafa
kitne be-gana-e-ain-e-vafa hain ye log
zakhm-dar-zakhm mohabbat ke chaman-zar men bhi
faqat ik ghuncha-e-mantiq ke gada hain ye log
main unhen gulshan-e-ehsas dikhaun kaise
jin ki parvaz-e-basirat par-e-bulbul tak hai
vo na dekhenge kabhi had-e-nazar se aage
aur miri hadd-e-nazar hadd-e-takhayyul tak hai
dil ke bhedon ko bhi mantiq men jo uljhate hain
yuun samajh len ki babulon men bhi phuul aate hain
Leave a Reply