Mohammad Sharfuddin Sahil
mausam-e-hijr ki dil-soz nishani dega
ishq ka dard hi unvan-e-kahani dega
sang-e-be-maya hai shak aur yaqin hai gauhar
vaqt-e-taqrir yahi shola-bayani dega
khul na jaa.e kahin maktub se raz-e-pinhan
jab vo dega koi paigham zabani dega
nafs-e-ammara ko quvvat se kuchal de apni
varna taklif tujhe ahd-e-javani dega
siikh le us ko baratne ka saliqa ‘sahil’
lafz be-jan sahi husn-e-ma.ani dega
Leave a Reply