Saif Zulfi
itne dukhi hain ham ko masarrat bhi gham bane
amrit hamare honT se mas ho to sam bane
ro.e ba-rang-e-abr farishte bhi gundh kar
kis dasht-e-ashk-o-ah ki miTTi se ham bane
kuchh aur bhi to shish-mahal raste men the
kyuun ham faqat nishana-e-sang-e-sitam bane
ankhon ke samne hai shikasta dar-e-sukun
ham tak rahe hain der se tasvir-e-gham bane
barse hain dasht-e-zist men ham par vo sang-o-ḳhisht
yakja simaT ke aa.en to koh-e-alam bane
lahje ke bankpan men chhupate hain dil ka soz
ham aise rakh-rakhao ke fankar kam bane
jo dastan miTa.i ziyada likhi ga.i
jitne hamare haath tarashe qalam bane
‘zulfi’ vo sarzamin ki jahan dafn hai ‘shakeb’
vo kyuun na ahl-e-fan ke liye mohtaram bane
Leave a Reply