nim-cha jald myaan hi na miyan kijiyega
nim-janon ka abhi kaam ravan kijiyega
taqat-e-garmi-e-khurshid-e-qayamat hai kise
taab ki dagh-e-jigar se na fughan kijiyega
dil men tum ho na jalao mire dil ko dekho
mera nuqsan nahin apna ziyan kijiyega
kah do baqqal pisar se ki mira dil le kar
qasd-e-akhz-e-dil-e-aghyar na haan kijiyega
dil se dil paas hain to bhi hai dilon ki khvahish
kya dilon ki kahin dilli men dukan kijiyega
aur bhi soz-e-jigar bazm men hoga raushan
shama saan qata agar meri zaban kijiyega
yaar jab saath safar men ho kahan ki rozi
roz rozon hi men id-e-ramzan kijiyega
kis se yarab kahun ahval ye kahta hai vo but
apni yaan ram-kahani na bayan kijiyega
vo dhuan-dhar si zulfen hain nazar men har shab
vird ab sura-e-vallail-o-dukhan kijiyega
shahr-e-dil ki tumhen abadi ka kuchh bhi hai khayal
ya jahan rahiyega viran hi vahan kijiyega
meri janib se kaho mohtasib-e-shahr se ye
sai-e-arzani-e-mai az dil-o-jan kijiyega
paani pi pi ke tumhen devenge dushnam ye rind
tum subuk hoge agar baada giran kijiyega
jald ‘ehsan’ se kaho vo but-e-khud-kam aaya
ab to lillah kahin band zaban kijiyega
Leave a Reply