Lazzat-E-Agahi

main ajiib lazzat-e-agahi se do chaar huun

yahi agahi mira lutf hai mira karb hai

ki main janta huun

main janta huun ki dil men jitni sadaqaten hain

vo tiir hain

jo chalen to naghma sunai de

jo hadaf pe ja ke lagen to kuchh bhi na bach sake

ki sadaqaton ki nafi hamari hayat hai

mire dil men aisi haqiqaton ne panah li hai

ki jin pe ek nigah Dalna

surajon ko butun-e-jan men utarna hai

main janta huun

ki hakimon ka jo hukm hai

vo dar-asl adl ka khauf hai

vo sazaen dete hain

aur nahin jante

ki jitni sazaen hain

vo sitamgari ki ridaen hain

mujhe ilm hai

yahi ilm mera surur hai ye ilm mera azaab hai

yahi ilm mira nasha hai

aur mujhe ilm hai

ki jo zahr hai vo nashe ka dusra naam hai

main ajiib lazzat-e-agahi se do-char huun

Leave a Comment