aaqil hai ba-shu.ur hai kaafi zahin bhi
is par hai mustazad vo az-had hasin bhi
bosa kisi bhi phuul ka ham ne nahin liya
ruḳhsar muntazir rahe lab bhi jabin bhi
ghar le liya hai ain tire ghar ke samne
aur ik ḳharid laaya huun main durbin bhi
sab kaam ho rahe hain ajiib is qadar ajiib
likhne se pahle sochte hain katbin bhi
ik shoḳh-o-shang tifl chhupa hai darun-e-dil
sanjida lag raha huun ba-zahir matin bhi
ankhon men jis ki rahm ho hathon men roTiyan
vo shaḳhs muflison ka dharam bhi hai diin bhi
insaniyat ke jism pe chand aise daagh hain
jin par hai sharmsar falak aur zamin bhi
hanste hue marega koi dil gazida shaḳhs
aa.ega is Darame ke andar vo siin bhi
ash.ar gar safar na karen dil se dil talak
dete nahin hain daad ‘qamar’ sama.in bhi
Leave a Reply