kis ko milne ka us ke chaav nahin
kis ko us shoḳh se lagao nahin
kaun sa dil hai vo ki jis dil men
us ke tir-e-nigah ka ghaav nahin
mus.haf-e-ruḳh pe kyunki Thahre nazar
is men mutlaq koi rahav nahin
dil tha apna diya jise chaha
kuchh kisi ka hamen dabao nahin
ahal-e-ghairat ko nan-e-ḳhushk apni
ba-ḳhuda kuchh kam az polav nahin
bas kaha maano aao hazrat-e-dil
jhuTe va.adon pe us ke jaao nahin
qaul hai ahal-e-tajraba ka yahi
azma.e ko azmao nahin
atish-e-gham men teri furqat ne
dil ko kis din diya tapav nahin
us ke ruḳh ki vo ab-o-tab hai ‘aish’
mah-o-ḳhurshid jis ke paav nahin
Leave a Reply