Poet
chhup gaya yaar ḳhud-numa ho kar
rah ga.i chashm-e-shauq va ho kar
be-qararon se un ko sharm aa.i
shoḳhiyan rah ga.iin haya ho kar
kya kahun kya hai mere dil ki ḳhushi
tum chale jaoge ḳhafa ho kar
ruuTh kar un se ham kahan jiten
vo mana lete hain ḳhafa ho kar
phans gaya dil to chhoḌ do ham ko
ab kahan ja.enge riha ho kar
dil se kuchh kah rahi hain vo ankhen
dekhen kya Thahre mashvara ho kar
haath uTha kar talash-e-dil se ‘hasan’
baiTh rahiye shikasta-pa ho kar
Leave a Reply