ab ke baras honTon se mere tishna-labi bhi ḳhatm hui
tujh se milne ki ai dariya majburi bhi ḳhatm hui
kaisa pyaar kahan ki ulfat ishq ki baat to jaane do
mere liye ab us ke dil se hamdardi bhi ḳhatm hui
samne vaali building men ab kaam hai bas ara.ish ka
kal tak jo milti thi hamen vo mazduri bhi ḳhatm hui
jail se vapas aa kar us ne pan.cho vaqt namaz paḌhi
munh bhi band hue sab ke aur badnami bhi ḳhatm hui
jis ki jal-dhara se basti vaale jivan paate the
rasta badalte hi naddi ke vo basti bhi ḳhatm hui
Leave a Reply