rind betab hain ghanghor ghaTa chha.i hai
mai-kade guunj rahe hain vo bahar aa.i hai
bazm-e-aghyar men us ne mujhe daryaft kiya
ba.ad muddat ke use yaad miri aa.i hai
kaT hi jaati hain kisi tarah hamari raten
gham salamat rahe vo monis-e-tanha.i hai
qatl karne ko mire aate hain vo tegh-ba-dast
main samajhta huun mire haq men masiha.i hai
un ko ye zid hai na dekhenge kabhi meri taraf
main ne bhi dar se na uThne ki qasam khaa.i hai
hai ye rindon ke ta.aqub men koi raaz amiiq
varna auron se bhi vaa.iz ki shanasa.i hai
puchhne aa.e hain vo haal mira ai ‘hafiz’
zo.af se salb yahan taqat-e-goya.i hai
Leave a Reply